Herceg Novi – Tradicionalno, od 1994. na prelijepoj hercegnovskoj Kanli Kuli, tvrđavi koja dominira starim gradom, u okviru tri festivalske večeri viđeni su najuspješniji domaći i strani stvaraoci u prethodnoj godini, kao i debitanti – buduće zvijezde u pop muzici. Impresivno urađenom scenografijom ovogodišnjeg festivala Sunčane Skale, prodefilovali su između ostalih Kemal Monteno, Goran Karan, Ivana Banfić, Željko Joksimović, Bojan Marović.
<>Od prvog dana koncepcija Sunčanih Skala je nepromjenjena – prvo veče je dodjela Prinčevih nagrada gdje u šesnaest kategorija za zlatne plakete konkurišu najuspješniji umjetnici u prošloj godini na EX YU prostorima. Ove godine u konkurenciji su Vlado Georgijev, Zdravko Čolić, Kemal Monteno, Bojan Bajramović, Anabella, Aleksandra Radović, Ana Stanić, Goca Tržan, Ivana Banfić, Maja Nikolić, Hari Mata Hari, Magazin, Crvena jabuka, Zana i ostala zvučnia imena balkanske estrade. Među njima najviše uspjeha je imao Željko Joksimović koji je osvojio priznanja za najbolju mušku interpretaciju, najbolju kompoziciju i hit godine sa pjesmom ''Lane moje''. Druge večeri se takmiči dvadest i pet mladih umjetnika – debitanata u večeri nazvanoj ''Nove zvijezde'', a pobjednik stiče pravo da konkuriše i na poslednjoj večeri takmičenja kada se bira ''Pjesma ljeta".
Na Sunčanim Skalama 2004. u konkurenciji novih zvijezda pobijedila je Ivana Popović sa pjesmom ''Odlazi'' sa kojom je nastupila i u ''Pjesmi ljeta'' i zabilježila veliki uspjeh osvojivši treće mjesto. ''Srebrnu sirenu'' na ''Pjesmi ljeta'' osvojila je Goca Tržan sa kompozicijom ''Haljina''. ''Mislim da je pjesma jako lijepa i raduje me što je publika bila oduševljena, a sve ostalo je manje bitno. Cijeli moj novi album koji snimam ovog ljeta je hit do hita, a možda ću i do Amerike, mada se uvijek teško odvajam od prelijepog Herceg Novog'', rekla je Tržan posllije dodjele nagrada. Pobjednik ovogodišnjih Sunčanih Skala po mišljenju stručnog žirija je Romana sa pjesmom ''Nikad i zauvjek'', koju su za nju napisali i aranžirali Marina Tucaković i Željko Joksimović. ''Smatram da će ovaj festival i ova pjesma biti prekretnica u mojoj karijeri. Moram da priznam da nisam očekivala ovakvu reakciju publike, posebno ne ove u Herceg Novom. Nisam sigurna šta se dogodilo i čemu zvižduci, da li im se nije dopala pjesma ili je nešto drugo u pitanju neznam ali će na kraju biti sve u redu'', kazala je Romana poslije dobijene ''Zlatne sirene'' i nagrade od dvadeset pet hiljada eura koliko je predviđeno za pobjednika Sunčanih Skala.
Inače, novina na ovogodišnjem festivalu je i saradnja predstavnika hercegnovske Opštine sa organizatorima Sunčanih Skala, tako da je prvi put festival otvorio gradonačelnik, Dejan Mandić, koji je između ostalog rekao da festival i grad imaju istu dušu i da Skale trebaju Novom i Novi treba Skalama. U tom kontenstu su direktor festivala, Slobodan Bučevac, i izvršni producent, Vuk Rajković, obećali naredne godine bolju organizaciju i kvalitet festivala. Sve u svemu, Sunčane Skale definitivno ulaze u zvaničnu turističku ponudu Boke.
Nebojša Mandić
